క్లేశం

సన్న ఇసుక పైకిలేచి
సుళ్ళు తిరిగి ఎగురుతుంది
ఆకాశం ఉన్నట్టుండి
అనేక రంగులు మారుస్తుంది

జోరుగాలి బలంగా
ఝాడించి ముందుకు నెడుతుంది
కాళ్ళ కింద ఇసుక
కదిలి జారిపోతుంది

చెవుల నిండా ధూళి
చేరి నిండుకుపోతుంది
ఏదో ఒక ఇసుక రేణువు
ఎగిరి కళ్ళల్లో దూరుతుంది

ఆ గొడవలో,దుమ్ము కింద కప్పడి
ఆత్మ కనిపించకుండా పోతుంది.

తారామతి బిరాదరి

పేరు తెలియని చెట్టు ఒకటి

వానకు తడుస్తూ నిలబడిఉంది

దూరాన,ఎన్నడో మరణించిన

నాన్న గొంతు వినబడుతోంది

ఆదరా బాదరా ఓ యువతి

బిరాదరిలోకి పరిగెడుతోంది

ఎక్కడినించో తారామతి పాట

రెక్కలార్చుతూ వరండాలో వాలుతోంది

మబ్బు కొప్పులోంచి నీళ్ళ దండ

జారి చెట్ల కొమ్మల్లో చిక్కుకుంటోంది

గత రాత్రంతా నిద్రించని ఈ దేహాన్ని

అన్ని వైపులా నుండి ఏవో అదృశ్య హస్తాలు

ఊపేస్తున్నట్టుగా అనిపిస్తోంది.